????
زائر
 |  موضوع: {{{ لقاء الوحوش - خيشه وخربوش }}}  الأربعاء 17 فبراير 2010, 9:15 am | |
| [ندعوك للتسجيل في المنتدى أو التعريف بنفسك لمعاينة هذه الصورة] ** خيشه وخربوش فى زمن اللى ما يختشوش **
المكان : - قهوة بلدى أو بار تحت بير السلم
الزمان : - زمن السبهلله وكله يرقص كله يغنى
يجلس المعلم { خيشة المِتعْور } أكبر مقاول توريد أنفار للآخره ( حانوتى يعنى وتربى وقت اللزوم وكل ما يلزم الرحيل من الدنيا للآخره ) وبجانبه { خربوش المِتعاص } مساعد مخرج سينما درجه تالته ضاربه السلك وعايش عواله على قفا أمثال خيشه المتعور
{ هاتقولى لى إيه لم الشامى على المغربى
هاقولكم أهو كله إخراج}
وقاعدين أخر صهلله وبيشربوا زى السفنجه من زجاجة ( منقوع صُرم ) ماركة قابلنى فى جهنم , وبعد الدنيا ما تزرق وتخضر وتحمر فى عنيهم يميل خربوش على خيشه ويقول له
خيشه : - الأشية معدن والحمد لله يادوب لسه مقفل الأرنب التانى أول إمبارح
خربوش :- طيب ما تيجى أعملك مشروع فل الفل والجنيه فيه بيعمل إتنين وتلاته
خيشه : - مشروع إيه ده اللى الجنيه يعمل فيه إتنين وتلاته ؟
خربوش : - هو أنا أعرف غيرها يا معلم ؟ السيما طبعاً يا معلم ؟ . هو فيه أحلى من السيما ومزز السيما ؟
خيشه : - سيما إيه يا مهبوش إنت ؟ هو أنا بتاع سيما ؟ وبعدين أنا مش بعرف أمثل ووشى مش فوتوكوبيا لا مؤاخذه .
خربوش : - ها ها ها ها , قصدك فوتوجينيك يا معلم , بس إنت مش هاتمثل , إنت هاتنتج أفلام .
خيشه : - هانتج أفلام ؟ يعنى عدم المؤاخذه هافتح مصنع وأجيب فيه ماكنه تحط الممثلين من ناحية تطلع من الناحية التانيه أفلام ؟
خربوش : - مصنع إيه وماكنه إيه يا معلم ؟ الإنتاج يعنى تصرف على الفيلم لحد ما يتصور ويتباع , ولو صرفت عشره هاتلمهم فى ظرف شهر عشرين ولا تلاتين
خيشه : - طيب بس انا ما عنديش فكره عن السيما دى ؟ ولا بيعملوا الأفلام دى إزاى ؟
خربوش : - ولا يهمك يا معلم . طول ما معاك أخوك الصغنن خربوش خش فى السيما بقلب زى الحديد , هو يعنى شغل السيما ده لا مؤاخذه يعنى كيميا ولا فيزيا ؟
خيشه : - هو إنت علشان شلتلى شنطة مخرج نص لبه فى كام فيلم هاتعملى فيها خبير سيما و( مارليم مورورو ) كمان ؟
خربوش : - أصبر بس يا معلم بلا مارليم مورورو بلا مارى منيب , الحكاية بسيطه خالص , إنت تدب إيدك فى جيبك وتطلع 200 ولا 300 ألف وما لكش دعوه بالباقى .
خيشه : - إنت أتهبشت فى مخك ياض ولا إيه ؟ ولا منقوع الصرم ده لحس نافوخك ؟ 200 ولا 300 ألف إيه ؟ ده أنا باسمع أن عادل إمام بياخد فى الفيلم الواحد جوز أرانب شوف بقى لما تجيب معاه البت( سميه الخشاب ) ولا المزه ( هند صبرى ) هايخدوا كام هما كمان ؟
خربوش : - لا لا لا ,, ده إنت اللى دماغك إتلحست يا معلم , مين جاب سيرة عادل إمام وهند وسميه يا عم ؟ دول ممثلين كسر وساكند هاند , بس لولاش الموضوع هو الصيت ولا الغنى
خيشه : - الله ,, أمال هاتجيب مين يعمل فيها بطل الفيلم ؟ تكونش هاتجيب عمر الشريف ؟ ماهو بردو سعره غالى وبيقبض بالدولار كمان
خربوش : - إسمع بس يا معلم . إنت وافق على الفكره والمشروع وسيب الباقى علي ,, إنت مش ليك فلوسك ترجعلك الطاق أتنين ولا تلاته ؟ ده غير كمان الحظ والفرفشه مع إخواتنا يانبيع الحنان والمزز المدملكه , وساعتها يا عم إنت المنتج بقى ؟ وشوف بقى ؟ ألف مين تتمنى لك الرضا ترضى .
يبرم المعلم خيشه شنبه الذى يشبه شراشيب السجاده ويعدل العمه واللاسه ويسرح فى كلام خربوش ويتخيل المزز وذوات اللحم الأبيض المتوسط والوسط الزمبلك وهنا تتسع إبتسامته ويبصم بالموافقه
خيشه : - ماشى موافق ياض يا خربوش , بس قولى بقى عدم المؤاخذه الخوطه إيه ؟ يعنى القصه و( السيماريو والحمار ) اللى بيقولوا عليه ده وكمان الممثلين والمخرج والمصوراتيه وكده يعنى ؟
خربوش : - يا عم إسمه سيناريو وحوار ,, حمار إيه وجحش أيه ؟ وبعدين بص يا سيدى بقى أنا عندى ليك حتة نتفة واد ممثل إنما إيه ؟ إوعى وشك , تمثيل إيه وشياكة أيه ووشه كمان فوتوجينيك بس هو يعمل العمليه ويشيل أثر البِشله اللى واكله نص وشه وهايبقى قمر 14 إسمه ( بهلول الدهول ) , وعندى ليك كمان حتى مزه صاروخ نووى , سبع صنايع والبخت ضايع , تمثل ماشى , ترقص شغال , تغنى ما فيش مانع , ده غير المواهب والتضاريس التانية ( ويغمز خربوش بعينه ويرسم بيده فى الهواء تجسيم ذا معنى ) إسمها { توحيده بشتكها } بس هى تخسيلها بتاع عشرين تلاتين كيلو وتفرد شعرها عند الكوافير وساعتها تقول للبت هيفا وهبى , روحى إعملى عملية تجميل يا معفنه .
خيشه :- ودول بالصلا على النبى هما اللى هايقوموا بالفيلم لوحدهم ؟ ولا فيه معاهم وجوه ملعلطه تانى ؟ وهايخدوا كام لا مؤاخذ ؟
خربوش : - لا طبعاً هايبقى معاهم ناس تانيه بس بقى نص لبه , كومبارس يعنى , وعلى قد لحافك مد رجليك , وبعدين ما تشيلش هم أجرهم ؟ دول بالصلا على النبى يقومولك بالفيلم والإعلانات بتاعته كمان وممكن تأبج الواحد فيهم تلاتينايه ولا خمسينايه , وكلك نظر بقى .
خيشه : - طيب القصه يا فالح مش ندور على الموضوع الأول ؟ حكم أنا عايزه موضوع ( هاتف ) يعنى بيبين مشاكل الناس وكمان يرد على اللى بيهاجموا الأغنيا اللى زى حالتنا لا مؤاخذه وبيقولوا علينا شبعه بعد جوعه . وبناكلها من جثث الاموات .
خربوش : - يا عم القصه أكتبهالك دلوقتى وإحنا قاعدين فى كلمتين , والسيناريو أهو حته من الفيلم ده على حته من التمثيلية دى وتمشى وتبقى فله ,
خيشه : - طيب والمخرج يا فالح ؟ عايز مخرج لا مؤاخذه إسمه يكسر الدنيا ؟ إيه رأيك فى ( يوسف شاهيم )
خربوش : - يوسف شاهين مين يا عم ؟ الراجل مات من زمان ؟ وبعدين يا راجل بقى أنا بقالى إسبوع بقنع فيك وعملت لك البحر طحينه وجبت لك الممثلين والممثلات وفى الآخر تقولى مين المخرج ؟ أمال أنا هاعمل إيه ؟ هاسرح بسميط وجبنه وحاجه ساقعه على الممثلين ؟
خيشه : - نهار أبوك مدوحس ؟ هو إنت راسم على إنك تخرج الفيلم ؟ هى ناقصه بلاوى يا جعر إنت ؟ إنت كبيرك تقف ورا المخرج وتهوى عليه لما يكون حران ؟ وتهش عنه الدبان يا جربان .
خربوش : - لا يامعلم ؟ لاحظ إن كلامك جارح .. أنا أجدع من أجدعها مخرج فيكى يا هوليود وواخدها ممارسه كمان . لولاش الحظ والنصيب , كان زمانى واخد الأوسكار .
خيشه : - خلاص إنت هاتعيط ؟ وهاتخرط على قلبى بصله ؟ بلا أوسكار بلا صبغة يود ؟ ماشى ياض إخرج إنت الفيلم ؟ بس ورحمة شرفك , لو الفيلم سقط لأخرجك أنا من الدنيا دى , وعلى نقاله زفره كمان ...
منقوووووووووووووووول |
|
